इस्लामावाद- पाकिस्तानमा ईश निन्दाको आरोपमा इसाई दम्पत्ति पक्राउ परेका छन् ।

पाकिस्तानको लाहोर सहरमा इस्लाम धर्मग्रन्थ कुरानको अपमान गरेको आरोपमा उजुरी दर्ता भएपछि उनीहरुलाई पक्राउ गरिएको पाकिस्तानबाट प्रकाशित हुने डन अखबारले जनाएको छ ।

हर्बन्सपुरा क्षेत्रमा बसोबास गर्ने तैमुरका अनुसार फलफूल पसलमा सामान किन्दै गर्दा माथिबाट कुरानका पाना फ्याकिएको देखेपछि ती इसाई दम्पत्तिविरुद्ध उजुरी दर्ता गरिएको थियो ।

प्रहरीले शौकात मसिह र उनकी श्रीमती किरनविरुद्ध ऊजुरी दर्ता गराएको छ । उनीहरुविरुद्ध पाकिस्तानी अपराध संहिताको धारा २९५ बी अनुसार कारवाही अघि बढाइने जनाइएको छ । उनीहरुविरुद्ध आवश्यक अनुसन्धान अघि बढाइएको प्रहरीले जनाएको छ ।

पछिल्लो समय पाकिस्तानमा ईश निन्दाको झुठो आरोपमा धार्मिक अल्पसङ्ख्यकविरुद्ध दमन बढेको बताइएको छ । मानव अधिकारवादीहरुले भने पाकिस्तानमा ईश निन्दा कानूनको दुरुपयोग बढेको भन्दै आलोचना गरेका छन् ।