काठमाडौँ– चाडपर्व नजिकिएसँगै उदयपुरमा बजार अनुगमनलाई तिव्रता दिइएको छ । 

बजारमा अखाद्य पदार्थको बिक्री वितरण भएको गुनासो आउन थालेपछी जिल्ला प्रशासन कार्यालय उदयपुरले बजार अनुगमनलाई तिव्रता दिएको छ ।  जिल्ला स्थित संयुक्त जिल्ला अनुगमन समितिले सदरमुकाम गाईघाट बजारका पसलहरूमा नियमित अनुगमन शुरु गरेको हो ।

चाडपर्व सुरु भएसँगै व्यापारीले म्याद गुज्रेका बस्तुहरू बिक्री गर्ने, अखाद्य बस्तुको बेचविखन गर्ने, दैनिक उपभोग्य वस्तुहरूको कृतिमा अभाव सृजना गर्ने जस्ता गुनासो आएपछि बजार अनुगमन गरिएको जिल्ला प्रशासन कार्यालय उदयपुरका सहायक प्रमुख जिल्ला अधिकारी विनोद पोखरेलले बताए ।

टोलीले २७ वटा पसलमा अनुगमन गरेकोमा ८ वटा पसललाई सचेत गराएको र करिब ५० हजार बराबरको अखाद्य पदार्थ जफत गरिएको जिल्ला घरेलु कार्यालयका अधिकृत कृष्ण घिमिरेले जानकारी दिए ।

  जिल्ला प्रशासन कार्यालयको नेतृत्वमा खाद्य प्रविधि तथा गुण नियन्त्रण डिभिजन कार्यालय, घरेलु तथा साना उद्योग कार्यालय, करदाता सेवा कार्यालय, त्रियुगा नगरपालिकाको कार्यालय, उद्योग वाणिज्य संघ, पत्रकार र प्रहरी सहितको टोलीले गाईघाट बजारका विभिन्न पसलहरूको अनुगमन गरेको छ ।