डडेल्धुरा– सुदूरपश्चिम प्रदेशका ३ पहाडी जिल्ला जाने सडक अवरुद्ध हुँदा यात्रुहरु अलपत्र परेका छन् । सुदूरपश्चिम प्रदेशलाई जोड्ने मुख्य मार्ग केआइसिंह राजमार्ग फेरि अवरुद्ध भएको हो । 

तीन पहाडी जिल्ला डोटी, अछाम र बाजुरा जोड्ने राजमार्ग अवरुद्ध भएपछि सो सडक खण्डमा सञ्चालित सवारी साधन आवतजावत रोकिएको छ ।

डडेल्धुरा जिल्ला प्रहरी कार्यालयका अनुसार डडेलधुराको गन्यापधुरा गाउँपालिका–२ स्थित रडुवामा पहिरो झरेका कारण राजमार्ग अवरुद्ध भएको हो । 

शनिबार रातिदेखिको भारी वर्षाका कारण राजमार्ग माथिबाट पहिरो खसेको छ भने आइतबार बिहान पनि थप वर्षा भएपछि बन्द भएको राजमार्ग सुचारु गर्न अझै सकिएको छैन ।

सो सडक खण्डमा राजमार्गको माथिबाट पहिरोले ढुङ्गा र रूखहरूसमेत बगाएर सडकमा ल्याएको छ । वर्षा नरोकिएको र पहिरो जाने क्रम अझै जारी रहेकाले सडक खुलाउने काम सुरु गर्न नसकिएको डडेलधुरा प्रहरीले जनाएको छ ।