काठमाडौँ– नेपाली कांग्रेसका नेता डा. शेखर कोइरालाले सङ्क्रमणकालीन न्यायसँग सम्बन्धित कानूनलाई लागू हुने गरि सदनबाट पारित गर्नुपर्ने बताएका छन् ।

बिहीबार संसद् भवन नयाँ बानेश्वरमा सञ्चारकर्मीसँग कुरा गर्दै नेता कोइरालाले सबैको भावनालाई मध्यनजर गर्दै सङ्क्रमणकालीन न्यायसँग सम्बन्धित कानूनलाई अन्तिम रूप दिएर सदनबाट पारित गराउनुपर्ने बताएका हुन् । 

कानून बनाउँदा कतिपय विषयलाई नजरअन्दाज गर्दा अदालतमा पुग्ने र कानून लागू गर्न नसकिने अवस्था सिर्जना हुने भएकाले मानवअधिकारको मूल्यमान्यतालाई समेत ध्यानमा राखेर उक्त कानून अधि बढाउनुपर्नेमा उनले जोड दिए ।

कोइरालाले सर्वोच्चको आदेश, अन्तराष्ट्रिय मूल्यमान्यता र पीडितलाई न्याय हुने गरि सङ्क्रमणकालीन न्यायसँग सम्बन्धित कानून बढाउनुपर्ने धारणा राखे ।

त्यस्तै उनले कांग्रेस नेता महेन्द्र यादवमाथिको आक्रमण समग्र लोकतन्त्रमाथिको आक्रमण भएको बताए ।