लण्डन– बेलायती प्रधानमन्त्री टेरिजा मेले इरानले बेलायती ध्वजावाहक ट्यांकर नियन्त्रणमा लिएको विषयमा प्रधानमन्त्री कार्यालय १० डाउनिङ स्ट्रिटमा आकस्मिक कोब्रा बैठक डाकेकी छिन् ।

गत शुक्रबार इरानले बेलायती ध्वजावाहक स्टेना इन्पेरो नामक तेल बोकेको पानीजहाज कब्जामा लिएपछि प्रधानमन्त्री मेले कोब्रा क्याबिनेटको आकस्मिक बैठक डाकेकी हुन् । उनका प्रवक्ताले इरानको कदम अस्वीकार्य रहेको टिप्पणी गरेका छन् भने बेलायती विदेशमन्त्री जेरेमी हण्टले पनि इरानलाई उक्त पानीजहाज तत्काल रिहा गर्न आह्वान गरेका छन् ।

यसैबीच बेलायतले इरानको सम्पत्ति रोक्का गर्ने विषयमा पनि विचार गरिरहेको समाचार सार्वजनिक भएको छ । बेलायतले इरानको सम्पत्ति रोक्का गरेको खण्डमा उसैपनि अमेरिकी नाकाबन्दीका कारण ओरालो लागिरहेको इरानको अर्थतन्त्र अझ कमजोर हुनसक्ने बताइएको छ ।
त्यसबाहेक इरानले बेलायती ध्वजावाहक पानीजहाज नियन्त्रणमा लिएसँगै उत्पन्न परिस्थितीबारे बेलायत सरकारले संसद्मा इरानविरुद्ध चाल्ने सम्भावित कदमबारे प्रस्ताव गरिने जनाइएको छ ।

हर्मुजको स्टे«ट जलक्षेत्रबाट शुक्रबार इरानले नियन्त्रणमा लिएको उक्त पानीजहाज हाल इरानको बन्दर अब्बास बन्दरगाहमा रहेको बताइएको छ । उक्त पानीजहाजमा रहेका १८ भारतीय कर्मचारीलाई रिहा गर्न भारतले यसअघि नै इरानसमक्ष आह्वान गरिसकेको छ ।