श्रीनगर- भारतको जम्मु कश्मीरको सीमावर्ती क्षेत्रमा केन्द्र सरकारले थालेको विकास परियोजनाबाट स्थानीयहरु हर्षित भएका छन् । भारत सरकारले संविधानको धारा ३७० खारेज गरेसँगै नयाँ विकासका परियोजनाहरु पनि सुरु गरेको छ ।

भारतीय समाचार संस्था एएनआईका अनुसार जम्मु कश्मीर क्षेत्रमा हाल पर्यटन उद्योगलाई लक्षित गरी परियोजनाहरु अघि बढाइएका छन् । पर्यटन क्षेत्रमा विकासको थप पहलसँगै जम्मु कश्मीरका उरी, केरन, ताङदार, टिटाल गुरेजजस्ता स्थानमा पर्यटकीय गतिविधिमा उल्लेखनीय वृद्धि भएको सरकारी अधिकारीलाई उद्धृत गर्दै एएनआईले जनाएको छ ।

यस क्षेत्रमा रहेका प्राकृतिक सुन्दरता र साँस्कृतिक सम्पदालाई प्राथमिकतामा राखेर पर्यटकीय गतिविधि सञ्चालन गरिएको छ । यसबाट विकासका साथसाथै प्राकृतिक एवम् साँस्कृतिक सम्पदाको संरक्षणमा पनि टेवा पुगेको छ ।

पर्यटकीय गतिविधि बढेसँगै जम्मु कश्मीरका सडक व्यापारी, युवा व्यवसायीका साथै होटेल, रेस्टुरेन्ट व्यवसायलाई पनि टेवा पुगेको एएनआईले जनाएको छ ।