श्रीनगर- पछिल्लो समय भारतको जम्मु कश्मीर स्टार्टअप व्यवसायका लागि ‘हब’ का रुपमा विकसित हुँदै गएको पाइएको छ । यसअघि जम्मु कश्मीरका शिक्षित युवाहरु सरकारी जागिरतर्फ आकर्षित थिए ।

गुड मर्निङ कश्मीरका अनुसार रोजगारीको सुरक्षा, आकर्षक तलब एवम् निवृत्तिभरणजस्ता सुविधाका कारण यस क्षेत्रका हजारौँ युवाहरुले सरकारी जागिरका लागि आवेदन दिने गरेका थिए ।

सरकारी अधिकारीहरुले भने सबै युवाहरुका लागि सरकारी जागिर सम्भव नभएको भन्दै आफ्नै व्यवसाय सुरु गर्न आह्वान गर्दै आएका थिए । यद्यपि पछिल्लो समय भने युवाहरु आफैँ व्यवसाय गर्नतर्फ उन्मुख हुन थालेको गुड मर्निङ कश्मीरले जनाएको छ ।

जम्मु कश्मीरका युवाहरुमा लगानी गर्ने आत्मविश्वास पनि बढ्दै जान थालेको छ । आफ्नै स्टार्टअप व्यवसाय सुरु गर्नका लागि जम्मु कश्मीरका युवाहरुले बैंक एवम् वित्तीय संस्थाहरुबाट ऋण पनि लिन थालेका छन् ।

जम्मु कश्मीरका युवाहरुमा देखिएको स्टार्टअप व्यवसायप्रतिको आकर्षणका कारण यस क्षेत्रमा बेरोजगारी दरमा पनि कमी आउने अपेक्षा गरिएको छ ।