काठमाडौँ- महोत्तरीको बर्दिबासमा भएको सवारी दुर्घटनामा परेर बुबा र छोरीको मृत्यु भएको छ ।

बर्दिबास नगरपालिका २ मा पर्ने बर्दिवास औरही सडकखण्डमा स्कुल बस र मोटरसाइकल आपसमा ठोक्किँदा बाबुछोरीको मृत्यु भएको हो ।

मृत्यु हुनेमा बर्दिवास ८ हात्तीलेटका ५५ वर्षीय उपेन्द्र महतो र उनकी २२ वर्षीया छोरी रविना रहेका छन् । जिल्ला प्रहरी कार्यालय महोत्तरीका सूचना अधिकारी प्रहरी नायब उपरीक्षक दिलिप गिरीका अनुसार दुर्घटनामा गम्भीर घाइते भएपछि छोरीलाई उपचारका लागि बर्दिबासस्थित ट्रमा सेन्टरमा पुर्‍याइएको थियो । उपचारका क्रममा उनको मृत्यु भएको प्रहरीले जनाएको छ ।

बुवा उपेन्द्रको जनकपुरस्थित प्रादेशिक अस्पतालमा मृत्यु भएको डीएसपी गिरीले जानकारी दिए । दुर्घटनापछि प्रहरीले ना १ क ९७८९ नम्बरको बस र त्यसका चालक बर्दिबास ४ का निरपराज नेपाललाई नियन्त्रणमा राखेको छ ।