काठमाडौँ– वरिष्ठ लोकगायक, संगीतकार तथा चलचित्र निर्देशक नारायण रायमाझीका आफ्ना गीत प्रत्यक्ष रुपमा प्रस्तुत गर्नका लागि ‘नारायण रायमाझी सांगीतिक साँझ’ आयोजना हुने भएको छ ।

राष्ट्रिय लोक तथा दोहोरी गीत प्रतिष्ठान नेपालको आयोजनामा यही भदौ १५ गते सांगीतिक साँझ आयोजना हुने भएको हो । प्रतिष्ठानले सांगीतिक साँझको सम्पूर्ण तयारी पूरा भएको जानकारी दिएको हो । प्रतिष्ठानका अध्यक्ष रीता थापामगरले स्रष्टाको सम्मानका लागि भदौ १५ गते दिउँसो १ देखि बेलुकी ७ बजेसम्म नेपाल प्रज्ञा प्रतिष्ठानमा सांगीतिक साँझ आयोजना गर्न लागिएको बताइन्।

उक्त एकल साँझमा रायमाझीले आफूले गाएका उत्कृष्ट गीत प्रस्तुत गर्ने जनाइएको छ । उक्त साँझलाई प्रतिष्ठानले राष्ट्रकै गौरवका रूपमा चित्रण गरेको छ । रायमाझी लोकगीत, संगीत, संस्कृतिको निरन्तर साधक हुन् । रायमाझीले आफ्नो सांगीतिक यात्रा भने विसं २०४२ सालदेखि सुरु गरेका हुन् । उनले त्यति बेला कारगिल (रेलिमै) बाट आफ्नो सांगीतिक यात्राको सुरुवात गरेका हुन् ।

उनका फुल्बुट्टे चोलीमा, राम्दी पुल तरने बित्तिकै, राम्दी पुल तर्ने, गेटमा बेली जाई, कालो केशमा रातो रिबन, शिरमा रिबन, तिनाउ खोलामा, पसिनाले पैसा साटेर, माया पैँचो नदेऊ साइँली, लाइछौ बेसन, नमुछे आमा दहीमा टीका, हाँसेर बोलिदेऊ माया, सान्नानीले झुक्यायो मलाईलगायत सयौँ गीत सबैका मन मुटुमा बसेका छन् ।