काठमाडौं – प्रि–सिजनको मैत्रीपूर्ण खेलमा सेभिल्लासंग लिभरपुर पराजित भएको छ । सोमबार बिहान सकिएको मैत्रीपूण खेलमा युरापियन च्याम्पियन लिभरपुल स्पेनिस क्लब सेभिल्लासँग २–१ गोल अन्तरले पराजित भएको हो ।

लिभरपुलविरुद्ध रक्षात्मक खेलेको सेभिल्लाका लागि खेलको ३५ औं मिनेटमा नोलिटोले गोल गर्दै टिमलाई अग्रता दिलाएका थिए । यस्तै, सेभिल्लाविरुद्ध खेलको ४४ औं मिनेटमा लिभरपुलका डिभोक ओरिजीले गोल गर्दै खेल १–१ गोल बराबरीको अवस्थामा पुर्‍याएका थिए ।

पहिलो हाफमा १–१ बराबरी रहेको खेलमा सेभिल्लाले युरोपियन च्याम्पियनलाई अन्तिमसम्म बराबरीमा रोक्दै उत्कृष्ट प्रदर्शन गर्‍यो । लिभरपुलका खेलाडीमाथि ‘किंक’ हानेपछि सेभिल्लाका जोरिस नागन्नले खेलको ७६ औं मिनेटमा रातो कार्ड पाउँदै १० खेलाडीमा सिमित भएको थियो ।

तर, खेलको अन्तिम समयमा सेभिल्लाका एलेजाद्रो पोजोले गोल गर्दै लिभरपुललाई स्तब्ध बनाए ।