काठमाडौँ – बालुवाटारस्थित ललिता निवास प्रकरणमा केन्द्रीय अनुसन्धान ब्यूरो (सीआईबी)ले तत्कालीन भूमिसुधार मन्त्री चन्द्रदेव जोशीसँग बयान लिएको छ । सीआईबीले सोमबार साँझ आफूसँग बयान लिएको जोशीले सामाजिक सञ्जालमार्फत जानकारी दिएका हुन् ।

‘अन्ततः बोझबाट हलुका भएको छु। सीआईबीसमक्ष बयान दिएर अइयो। सीआईबीलाई धन्यवाद । ललिता निवास काण्डको सम्बन्धमा मेरो भनाई सार्वजनिक नै छ। चाहिएको बेला आवश्यक सहयोगको लागि तत्पर छु’ उनले सामाजिक सञ्जालमा उल्लेख गरेका छन् ।

जोशी सोमबार बिहान बयान दिनका लागि सीआईबीको कार्यालयमा आफैं पुगेका थिए। जोशीलाई बिहान फाइल गइसकेको भन्दै फर्काइएको थियो ।

ललिता निवासको जग्गा व्यक्तिका नाममा लैजाने गरी मन्त्रिपरिषद्‌बाट भएका निर्णयमा संलग्न भएकामाथि सीआईबीले बयान लिइरहेको छ । अब पूर्वमन्त्रीद्वय विजयकुमार गच्छदार र डम्बर श्रेष्ठको बयान गराउन बाँकी छ।