काठमाडौँ– कोसी प्रदेशकी उपसभामुख सिर्जना दनुवारले प्रदेशसभा बैठक सञ्चालन गर्न असमर्थ रहेको जनाएकी छन् । 

आज बिहान आफू बिरामी परेको भन्दै उनले प्रदेशसभा सचिवालयलाई जानकारी गराएकी हुन् ।

उनले आफू अचानक बिरामी परेको र उपचारका लागि बाहिर जानुपरेको भन्दै आज र यसपछाडिका बैठक सञ्चालन गर्न नसक्ने सचिवालयलाई लिखित जानकारी गराएकी हुन् । 

उपसभामुख दनुवार आफैँले आज बिहान ८ बजेका लागि बोलाएको प्रदेशसभा कार्यव्यवस्था परामर्श समितिको बैठकमा समेत उपस्थित गइनन् ।

आज कोसीका मुख्यमन्त्री उद्धव थापाले प्रदेशसभाबाट विश्वासको मत लिने कार्यसूची रहेको छ । तर, दिउँसो १ बजेका लागि बोलाइएको प्रदेशसभाको बैठक अब के हन्छ भन्ने अन्योल कायम भएको छ ।

प्रदेशसभा नियमावलीको नियम ११ को उपनियम २ बमोजिमको अधिकार प्रयोग गर्ने गरी अध्यक्षमण्डलका सदस्य इस्राइल मन्सुरीलाई बैठकको अध्यक्षता गर्न उपसभामुखले जिम्मेवारी दिएकी छिन् । मन्सुरी नेपाली कांग्रेसतर्फका सांसद हुन् ।

मन्सुरी भन्दा ज्येष्ठ एमाले र राप्रपाका ८ सांसद यसअघि नै बिदामा बसेका छन् ।

९३ सदस्यीय प्रदेशसभामा विश्वासको मत प्राप्त गर्न ४७ प्रदेशसभा सदस्यको समर्थन आवश्यक पर्छ । गठबन्धसँग ठिक्क ४७ मत छ । मन्सुरीले बैठक सञ्चालन गर्नुपर्दा विश्वासको मत पाउन आवश्यक संख्या अपुग हुने स्थिति छ ।

उपसभामुख अनुपस्थित भएकाले दिउँसो फेरि कार्यव्यवस्था परामर्श समितिको बैठक बस्ने तयारी गरिएको स्वास्थ्यमन्त्री निर्मला लिम्बूले जानकारी दिइन् ।

प्रदेशमा विकसित नयाँ राजनीतिक परिस्थितिका विषयमा अहिले सत्ता गठबन्धनमा आबद्ध दलका नेताहरू छलफलमा जुटेका छन् ।