सिङ्गापुर– केही समयअघि रुसी सुन्दरीसँग विवाह गरेका मलेसियाका पूर्व राजा तथा केलान्तान राज्यका सुल्तान मोहम्मद पाचौंले ती रुसी सुन्दरीसँग सम्बन्धविच्छेद गरेको खुलासा भएको छ ।

सिङ्गापुरका एक अधिवक्ताले उनीहरुबीच पारपाचुके भएको पुष्टि गरेका हुन् । उनले दुई योग्य मुसलमानलाई साक्षी राखेर रुसी सुन्दरी रिहाना ओक्साना वोवोडिनासँग तीन तलाकका साथ इस्लामिक परम्पराअनुसार सम्बन्ध विच्छेद गरेको खुलासा भएको हो ।

यद्यपि मिस मस्को भइसकेकी ती रुसी सुन्दरीले भने आफू र सुल्तान मोहम्मदबीच सम्बन्ध विच्छेद नभएको दाबी गर्दै आएको समाचारमा जनाइएको छ ।

उमेरमा करिब २३ वर्ष फरक रहेका ५९ वर्षे सुल्तान मोहम्मद र २७ वर्षे सुन्दरी वोवोदिनाको विवाह गत वर्ष जुन ७ मा भएको थियो ।

मोहम्मद मलेसियाको सुल्तान रहेकै बेला दुईबीच भएको विवाहलाई शुरुमा गुपचुप राखिएपनि पछि सामाजिक सञ्जालमा उनीहरुबीच विवाह भएको समारोहका फोटो र भिडियोहरु भाइरल भएका थिए । पछि यही वर्षको जनवरीमा उनले मलेसियाको नरेशको गद्दि त्याग गरेका थिए ।

ती रुसी सुन्दरीले हालै बच्चालाई जन्म दिएको समेत जनाइएको छ । तर, मध्य जुलाईमा एकाएक उनीहरुबीच पारपाचुके भएको हल्ला शुरु भएको थियो, जसलाई रुसी सुन्दरी वोवोडिनाले खण्डन गरेकी थिइन् । हालै सिङ्गापुरका एक अधिवक्ताले गत जुन २२ मा उनीहरुबीच सिङ्गापुरमा इस्लामिक विधिबाट पारपाचुके भएको र पारपाचुकेको प्रमाणपत्र जुलाई १ मा जारी गरेको जनाएका हुन् ।