पोखरा-नयाँ शक्ति नेपालका संयोजक डा. बाबुराम भट्टराईले दुई तिहाइ मतसहितको सरकारले जनअपेक्षा अनुसार काम गर्न नसकेको आरोप लगाएका छन् ।

पोखरामा संसदीय पत्रकार मञ्च गण्डकी प्रदेशले आयोजना गरेको कार्यक्रममा भट्टराईले जनताले दिएको म्यान्डेडलाई सरकारले अघि बढाउन नसकेको आरोप लगाए ।

पूर्वप्रधानमन्त्री भट्टराईले जनचाहनाअनुरुप क्रमभङ्ग हुने गरी विकासमा फड्को मार्ने गरी काम गर्न सरकारलाई सुझाव पनि दिए । अहिलेका काम सामान्य क्रमिक विकासका क्रममा अघि बढेकारले देशको अर्थतन्त्र मजबुद नबनेको बताए ।

गरीबी, बेरोजगारीको समस्या समाधानका लागि औषत प्रतिव्यक्ति आय १० हजार डलर पुर्‍याउन दुई दशकसम्म आर्थिक वृद्धिदर दुई अङ्कमा बढ्नुपर्ने आवश्यकता रहेको उनले बताए ।

निजी क्षेत्रलाई लगानीमा आकर्षित गर्न नसक्दासम्म समृद्धि असम्भव भएको भन्दै उनले सरकारले लिएको समृद्धिको अभियानलाई सफल बनाउन निजी क्षेत्रको विश्वास जित्दै लगानीको वातावरण बढाउनुपर्ने बताए ।

समृद्धिका लागि सडक पूर्वाधार विकास आवश्यक रहेकाले तराई हुलाकीमार्ग, मध्यपहाडी हुलाकीमार्गका साथै उत्तरदक्षिण जोड्ने गरी कोशी, कालीगण्डकी, कर्णाली करिडोरलगायतको निर्माणकार्यलाई प्राथमिकतामा राख्न सरकारलाई सुझाव पनि दिए।