इस्लामावाद/काबुल- पछिल्लो समय पाकिस्तान र अफगानिस्तानबीचको सीमा क्षेत्रमा कायम असुरक्षा र कानूनविहीनताको कारण दुई मुलुकबीचको सम्बन्धमा तिक्तता उत्पन्न भएको छ । अफगानिस्तानको खामा प्रेसका अनुसार डुरेन्ड लाइन भनिने दुई मुलुकबीचको सीमालाई लिएर अफगान–पाक सम्बन्धमा तिक्तता आएको हो ।

सीमामा एकतर्फी रुपमा छेकबार लगाइएको अफगान पक्षको आरोप छ । विगत केही महिनायता दुई मुलुकका सुरक्षाकर्मीबीच सीमा क्षेत्रमा झडप र गोली हानाहानका घटना आउने गरेका छन् । यसबाट सीमा क्षेत्रमा बसोबास गर्ने जानजाती समुदायहरुले असुरक्षाको महसुस गर्न थालेको भारतीय समाचार संस्था एएनआईले जनाएको छ ।

सीमामा जारी असुरक्षा र तनावका विषयमा अफगानिस्तानले पाकिस्तानसमक्ष बारम्बार विरोध र असन्तुष्टी व्यक्त गर्दै आएको खामा प्रेसले उल्लेख गरेको छ ।

सन् २०२१ मा अफगानिस्तानमा तालिबानले सत्ता कब्जा गरेसँगै पाकिस्तानमा सक्रिय तालिबानले आतंककारी आक्रमणलाई तिव्र बनाएसँगै पाकिस्तान पनि अफगानिस्तानसँग क्रुद्ध रहेको बताइएको छ ।