काठमाडौँ- महामारीको रूपमा फैलिएको लम्पी स्किन रोग रोकथामका लागि चाँगुनारायण नगरपालिकाले खोप तथा उपचार अभियान सञ्चालन गरेको छ । कृषि क्षेत्रमा आधारित चाँगुनारायण नगरपालिकामा कृषि र पशुपालनमा आत्मनिर्भर यहाँका अधिकांश किसानको गाईपालन रहेको र यहाँका ८० प्रतिशत गाई लम्पी स्किनबाट प्रभावित भएपछि नगरपालिकाले खोप तथा उपचार अभियान सुरु गरेको हो ।

नगरपालिकाका प्रमुख जीवन खत्रीले यहाँका अधिकांश बासिन्दाको घरघरमा गाईभैँसी पालन रहेकोमा अधिकांशको घरमा लम्पी स्किन रोगले गाई बिरामी हुने र मर्न थालेपछि नगरपालिकाले अभियान सञ्चालन गरेको बताए ।

“एक महिना अगाडिदेखि नै यो रोगको महामारी फैलिएको थियो, हाम्रो तर्फबाट रोग नियन्त्रणका लागि सक्दो प्रयास ग¥यौँ, यहाँका ८० प्रतिशत गाई यो रोगबाट प्रभावित भएका छन्”, नगरप्रमुख खत्रीले भने, “लम्पी स्किन फैलिनबाट रोक्न र उपचार गर्न हामीले वडावडामा, गोठगोठमै पुगेर पशु चिकित्सक एवं प्राविधिक टोलीले निःशुल्क खोप लगाउने र उपचार गर्ने कार्यको थालनी गरेका छौँ ।”

नगरपालिकाको पशुपक्षी विकास शाखाले लम्की स्किन रोग नियन्त्रणका लागि प्राविधिक टोली खटाएर एक हजार पाँच सय खोप लगाएको उनले बताए । शाखाका चिकित्सकसहितको प्राविधिक टोलीले वडावडामा घुम्ती शिविरनै सञ्चालन गरेर गोठगोठमै पुगेर रोगको जाँच, निःशुल्क खोप, निःशुल्क औषधि वितरण गरी किसानलाई लम्की स्किन रोगबारे जनचेतनामूलक जानकारी गराएको छ ।

नगरप्रमुख खत्रीसहित बागमती प्रदेशसभा सदस्य सुरेश श्रेष्ठले एकसाता अगाडि बागमती प्रदेशका पशुपक्षी मन्त्री डा राजेन्द्र श्रेष्ठसँग भेट गरी लम्पी स्किन रोग नियन्त्रणका लागि पर्याप्त मात्रामा खोप एवं औषधिको व्यवस्था गर्न र पीडित किसानलाई तत्काल राहतको व्यवस्था गर्न माग गरेका थिए ।

महामारी नियन्त्रणका लागि नगरपालिकाले २४ सै घण्टा सेवा उपलब्ध गराउने व्यवस्था गरेको भन्दै उनले यो रोगबाट भएको क्षतिको विवरण सङ्कलन गर्ने कार्य भइरहेको जानकारी दिए । धेरै जसो किसानले पशु बीमा नगराएको र पशु बीमा गराउनुपर्छ भन्ने ज्ञान नहुँदा किसानले यो रोगबाट लाखौँको क्षति व्यहोर्नुपरेको छ ।

समयमै खोप नआउँदा महामारीले चरम रूप लिएपछि घरघरमा पालेका गर्भवती गाईदेखि दूध दिइरहेको गाईहरू मरेका छन् । पुश बीमा गराएकाले पनि बीमा कम्पनीबाट सहजरूपमा क्षतिपूर्ति नपाउँदा समस्या परेको छ । पशु बीमाको रकम किसानलाई बीमा कम्पनीले उपलब्ध गराउन समेत नगर प्रमुख खत्रीले आग्रह गरे ।