धुलिखेल– काभ्रेपलाञ्चोकको रोशी गाउँपालिकाका–१ मा एक हजार सात सय ८० नागरिकले निःशुल्क स्वास्थ्य बीमा गराएका छन् । गाउँपालिकाले ६० वर्षभन्दामाथिका ज्येष्ठ नागरिकको निःशुल्क स्वास्थ्य बीमा गर्ने व्यवस्था मिलाएपछि आर्थिक वर्ष २०७९-८० मा उनीहरु स्वास्थ्य बीमा अभियानसित जोडिएका हुन् ।

गत आर्थिक वर्षमा गाउँपालिकाले निःशुल्क स्वास्थ्य बीमा गर्नका लागि रु ८० लाख विनियोजन गरेको थियो । पहिलो त्रैमासिकमा एक सय ९८, दोस्रो त्रैमासिकमा चार सय ३६, तेस्रो त्रैमासिकमा आठ सय ६ र चाँथो त्रैमासिकमा तीन सय ४० जनाले बिमाका लागि विवरण भरेको रोशी गाउँपालिकाका स्वास्थ्य शाखा प्रमुख गङ्गालाल श्रेष्ठले जानकारी दिएका छन् । 

गाउँपालिकाका अध्यक्ष दिनेश लामाका अनुसार पालिकाको पहिलो बैठकले ६० वर्षमाथिका जेष्ठ नागरिकको निःशुल्क स्वास्थ्य बीमा गर्ने निर्णय गरेको थियो । पालिकाले यस वर्ष पनि सो अभियानलाई निरन्तरता दिएको छ । यस्तै मातृ तथा नवजात शिशु मृत्युदर घटाउनका लागि ‘सुत्केरी आमा पोषिलो खाना’, निःशुल्क एम्बुलेन्स सेवा, स्वास्थ्यकर्मीद्वारा सुत्केरी घरभेट र ग्रामीण भिडियो एक्स–रे कार्यक्रमका अतिरिक्त बालबचाउ कार्यक्रमलाई निरन्तरता दिने भएको छ ।