हङकङ- हङकङमा पत्रकारलाई काम गर्न कठिन हुँदै गएको पाइएको छ । हालै सार्वजनिक सर्वेक्षणका अनुसार पछिल्लो १८ महिनायता हङकङमा पत्रकारको अवस्था खराब बन्दै गएको छ ।

फरेन कोरेस्पोन्डेन्ट क्लब हङकङले सार्वजनिक गरेको सर्वेक्षणका अनुसार पत्रकारहरुले निरन्तरको निगरानी, दुव्र्यवहार र समाचारको स्रोतबाट सूचना नपाउने समस्याजस्ता कठिनाइको सामना गर्नुपरेको पाइएको हो ।

गत मे महिनामा गरिएको सर्वेक्षणमा ६६ मध्ये ५५ जना पत्रकारले अर्थात् ८३ प्रतिशतले पत्रकारको अवस्था खराब बन्दै गएको बताएका थिए ।

चीनले सन् २०२० मा राष्ट्रिय सुरक्षा कानून ल्याएयता हङकङमा प्रेस स्वतन्त्रता एवम् अन्य अधिकार खस्किँदै गएको बताइन्छ । यस कानूनले नागरिक अधिकारवादी, सामाजिक अभियन्ता, पत्रकार एवम् लोकतन्त्रवादीहरुलाई निशाना बनाउने गरेको अन्तर्राष्ट्रिय सञ्चार माध्यमले जनाएका छन् ।