बाजुरा– लगातारको वर्षाका कारण बाजुरा जिल्लाका अधिकांश बस्ती पहिरोको जोखिममा रहेका छन् । जथाभावी सडक खनेका कारण बस्ती जोखिममा परेका हुन् ।

बस्तीको बीचमा सडक खनेपछि अधिकांश बस्ती पहिरोको जोखिममा परेका हुन् । ती बस्तीका बासिन्दा रातभर जाग्राम बस्ने गरेका छन् । पहिरोको डरले उनीहरु सुरक्षित स्थानमा गई बास बस्ने गरेका छन् । बूढीनन्दा नगरपालिका–७ सेरकाटियाको दलित बस्ती भएर सडक खनेपछि बस्ती धरापमा परेको दत्त विकले बताए ।

मार्तडी–कोल्टी सडक खण्डमापर्ने उक्त बस्तीका ४५ दलित परिवार बढी जोखिममा परेको स्थानीयवासी जयबहादुर विकले बताए । “सुरक्षित स्थानमा बस्ती स्थानान्तरणका लागि नगरपालिकालाई गुहार्दै आएका छौँ”, उनले भने ।

बूढीनन्दाका नगर प्रमुख पदमकुमार गिरीले नगरपालिकाका सबै वडाका बस्तीमा सडक खनेका कारण पहिरोको जोखिम रहेको बताए । “बस्ती सार्न उपयुक्त ठाउँ खोज्दै छौँ”, उनले भने । बूढीनन्दा नगरपालिकाको पिपलडालीस्थित हलिया बस्ती पनि पहिरोको जोखिममा छ ।