डोटी– लोक सेवा आयोगले स्थानीय तहका लागि खोलेका विभिन्न पदको परीक्षामा सहभागी हुन डोटी आएका परीक्षार्थीले बस्ने बास नपाएको गुनासो गरेपछि डोटीका प्रमुख जिल्ला अधिकारी टेकनारायण पौडेल स्वयं बासको खोजीमा हिडेका थिए ।

लोकसेवाको परीक्षा शुक्रबारबाट शुरु भएको हो । परीक्षाका लागि टाढा टाढाबाट प्रदेश ७ को परीक्षा केन्द्र डोटीमा पुगेका पुरीक्षार्थीहरुले होटेल अभावका कारण बास नपाएको गुनासो बढेपछि स्वयं प्रमुख जिल्ला अधिकारी नै परीक्षार्थीको बासको खोजीमा निस्केका हुन् । उनको साथमा प्रहरी प्रवक्ता लालबहादुर धामीलगायत थिए ।

यता लोकसेवा आयोगले गरेको विज्ञापन समावेशी र समानुपातिक नभएको भन्दै काठमाडौं लगायतका ठाउँमा आन्दोलन जारी छ । स्थानीय तहका लागि भन्दै गत असारमा लोक सेवाले ९ हजार १ सय ३२ पदका लागि आवेदन माग गरेको थियो ।

लोक सेवा आयोगले असारमा विभिन्न स्थानीय निकायले माग गरे बमोजिम भन्दै ९ हजार भन्दा बढी पदका लागि आवेदन माग गरेको थियो । लोकसेवाको विज्ञापन समावेशी समानुपातिक नभएको भन्दै सर्वोच्चमा रिट समेत परेको थियो । तर सर्वोच्च अदालतले विज्ञापन खारेज गर्नुपर्ने कारण नरहेको भनेसँगै लोकसेवालाई परीक्षा गर्नका लागि बाटो खुला भएको थियो ।