काठमाडौं– काठमाडौंका विभिन्न स्थानमा चोरीको घटना बढेको छ ।

बिहीवार नैकाप, कलंकी र घट्टेकुलोमा चोरीका घटना सार्वजनिक भएका छन् । चन्द्रागिरी नगरपालिका-१४ नैकाप बस्ने नकुल श्रेष्ठको घरबाट नगद तथा सुनचाँदीका गरगहना समेत गरी करिब १ लाख १३ हजार ३ सय रुपैयाँ बराबरको धनमाल बिहीबार दिउँसो चोरी भएको छ ।

यसैगरी काठमाडौं महानगरपालिका-१४ कलंकी डेरा गरी बस्ने नुवाकोट तारुका गाउँपालिका-७ घर भएकी मनिता भण्डारीको डेरा कोठाबाट नगद तथा सुनको बिभिन्न गरगहना समेत गरी करिब २ लाख ४२ हजार रुपैयाँ बराबरको धनमाल बिहीबार राति चोरी भएको छ ।

यस्तै काठमाडौं महानगरपालिका-२९ घट्टेकुलो बस्ने मकवानपुर घर भएका ३८ वर्षीय बाबुराम उपाध्यायको किराना पसलबाट नगद २ लाख ५० हजार रुपैयाँ, ब्ल्याकलेवल रक्सी १२ थान, रेड लेवल रक्सी १२ थान र वाईन ८ थान समेत गरी करिब ३ लाख ७८ हजार रुपैयाँ बराबरको धनमाल शुक्रबार बिहान चोरी भएको छ ।

चोरीमा संलग्न फरार व्यक्तिहरुको खोजी गर्नुका साथै यस सम्बन्धमा थप अनुसन्धान भइरहेको प्रहरीले जनाएको छ ।