इस्लामावाद- पाकिस्तानको इस्लामावादमा बौद्ध धर्मदेशना कार्यक्रम सम्पन्न भएको छ । नेपालस्थित लुम्बिनी बौद्ध विश्वविद्यालयका पूर्वउपकुलपति प्रा. डा. ह्रदयरत्न बज्राचार्य, नेपाली बौद्ध बिहारका संघनायक भिक्षु कौदन्य र कपन गुम्बाका लामा थिन्ले कुन्चकको उपस्थितिमा देर्मदेशना कार्यक्रम सम्पन्न भएको हो ।

कार्यक्रमको सुरूमा नेपालबाट आएका गुरुहरुलाई पाकिस्तानस्थित नेपाली राजदूत तापस अधिकारीले स्वागत गर्दै बौद्ध दर्शनका अहिंसा, दया, करूणा, समभाव एवं सम्यक ध्यान जस्ता विषयमा चर्चा गरेका थिए ।

पाकिस्तान सरकारले गान्धारा सभ्यतालाई संरक्षण गर्दै पर्यटन प्रवद्धन गर्ने नीति लिएको परिप्रेक्षमा गान्धारा सभ्यता र नेपाली संस्कृतिबीच अटुट सम्बन्ध रहेको उल्लेख गर्दै राजदूत अधिकारीले यसबाट पाकिस्तान र नेपालबीचको सम्बन्ध थप प्रगाढ बन्ने विचार व्यक्त गरे ।

उनले गौतम बुद्धको जन्मभूमी लुम्बिनी, नियमित धार्मिक एवं अध्यात्मिक क्रियाकलाप भइरहेका शताब्दीऔ पुराना बौद्ध महाविहार, बहि, चैत्य एवं गुम्बाले नेपाल बौद्ध धर्मको केन्द्रका रुपमा रहेको उल्लेख गरे ।

उक्त कार्यक्रममा प्रा. डा. बज्राचार्य, भिक्षु कौदन्य एवं लामा कुन्चकले बौद्ध धर्म दर्शनका विभिन्न पक्षहरूमा प्रकाश पार्नुका साथै सहभागीहरूबाट सोधिएका जिज्ञासाहरूको उत्तर दिएका थिए । त्यसैगरी, सो अवसरमा बौद्ध गुरूहरूले सहभागीहरूलाई ध्यान गर्न समेत सिकाएका थिए ।