काठमाडौं– सांसदहरुले सेवाग्राहीको काममा ढिलाइ गर्ने सरकारी कर्मचारीलाई कडा कारबाही गरिनुपर्ने व्यवस्था गर्न माग गरेका छन् ।
सेवाग्राहीको काममा ढिलाइ गर्ने कर्मचारीलाई कडा कारबाही गर्नेगरी कानून व्यवस्था गरिनुपर्ने सांसदहरुको माग छ ।
शुक्रबार संघीय संसदको राज्य व्यवस्था तथा सुशासन समितिको छलफलमा सांसदहरुले कर्मचारीलाई कडा कारबाही गर्ने गरी कानून ल्याउन माग गरेका हुन् ।
‘संघीय निजामती सेवाको गठन, संचालन र सेवाको सर्त सम्बन्धमा व्यवस्था गर्न बनेको विधेयक’माथिको दफावार छलफलमा भाग लिँदै सांसदद्वय झपट रावल र देवेन्द्रराज कँडेलले सेवाग्राहीको काममा ढिलाई गर्ने कर्मचारीलाई कडा कार्वाही हुने गरी कानुनी व्यवस्था गर्न सरकारसँग माग गरेका हुन् ।
सत्तारुढ दल नेकपाका सांसद झपट रावलले समयमा काम नगर्ने कर्मचारीलाई कडा दण्ड सजायको व्यवस्था नगर्ने हो भने सेवाग्राहीहरुले विगतमा भन्दा बढि सास्ती व्यहोर्नुपर्ने अवस्था आउने बताए ।
प्रमुख प्रतिपक्षी दल नेपाली काँग्रेसका सांसद देवेन्द्रराज कँडेलले सेवाग्राहीको काम समयमा नगरे त्यसको क्षतिपूर्ति सम्बन्धित कर्मचारीबाट असुल गर्ने कानुनी व्यवस्था गर्न सरकारको गम्भिर ध्यानाकर्षण गराए ।
कर्मचारीहरुले आफ्नो जिम्मेवारी सहज ढंगले पूरा नगरे कडा कारबाही हुने व्यवस्था नभएकाले मुलुक भ्रष्टाचारको दलदलमा फसेको उल्लेख गरेका सांसद कँडेलले अब कानूनमै काम नगर्ने कर्मचारीलाई कडा कारबाही गर्ने व्यवस्था गर्नुपर्ने बताए ।
प्रतिक्रिया