काठमाडौँ- नेकपा एमालेका सांसद योगेश भट्टराईले संसद चलाउने र संसदीय समिति सञ्चालन गर्ने सन्दर्भमा सरकार जिम्मेवार नदेखिएको आरोप लगाएका छन् ।

सिंहदबारमा आइतबार बसेको प्रतिनिधिसभा अन्र्तगतको सार्वजनिक लेखा समितिको बैठकमा सांसद भट्टराईले पछिल्लो ६ महिनाको अवधिमा सदन राम्रोसँग सञ्चालन हुन नसकेको र सदनलाई बिजनेश दिन पनि सरकार जिम्मेवार नदेखिएको उनले आरोप लगाए ।

उनले समिति प्रभावविहीन होस भन्ने सरकारको चाहना देखिएको जिकिर गरे । उनले समितिको बार्षिक क्यालेन्डर बनाएर महत्वपूर्ण विषयको सूची बनाएर नै छलफल गर्नुपर्ने र समितिले दिएका निर्देशनहरुलाइ बिनासर्त कार्यान्वयन गराउने अवस्था सिर्जना गर्नुपर्ने बताए ।

समितिका निर्देशन कार्यान्वयन गर्न प्रधानमन्त्रीलाई नै समितिमा बोलाएर प्रतिबद्धता लिनुपर्ने उनको भनाइ छ ।