काठमाडौँ- आम जनता पार्टीका अध्यक्ष तथा सांसद प्रभु साहले केही मुठीभर सम्भ्रान्तले मात्रै बैंकबाट ऋण पाउने अवस्था रहेको भन्दै यसको अन्त्य हुनुपर्ने टिप्पणी गरेका छन् ।

आइतबार प्रतिनिधिसभाको बैठकमा ‘मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८०’ माथिको छलफलमा भाग लिँदै सांसद साहले राष्ट्र बैंकबाट हुने गरेको पुँजी परिचालनबारे पनि प्रश्न उठाएका छन् ।

राष्ट्र बैंकले काठमाडौंबाहिर कति पुँजी परिचालन गरेको हो ? भन्ने प्रश्न गर्दै सांसद साहले आम मान्छे बैंकबाट ऋण लिन नपाएर ठगिन विवश भएको उल्लेख गरे । ‘बैंकले पैसा दिए आम मानिस व्यक्तिकहाँ किन ठगिन जान्छ ?’ उनले प्रश्न गरे ।

उनले आम जनता बैंकबाट ऋण नपाएपछि मिटरब्याजीहरूको मारमा परेको उल्लेख गर्दै मानिसहरु मिटरब्याजका कारण ठगिएको र आत्महत्या समेत गर्न बाध्य भएको कहालीलाग्दो अवस्था रहेको उल्लेख गरे ।