काठमाडौँ- नेपाली कांग्रेसका सांसद रामहरि खतिवडाले ललिता निवास प्रकरणमा साना माछा समाएर ठूला माछालाई उन्मुक्ति दिन नहुने टिप्पणी गरेका छन् । बुधबार प्रतिनिधिसभाको बैठकलाई सम्बोधन गर्दै उनले उक्त प्रकरणमा कसैलाई पनि उन्मुक्ति दिन नहुने बताएका हुन् ।

‘ललिता निवास प्रकरणमा साना माछाहरु ढोक्सामा पर्न लागेको सुनियो । ठूला चार अना, आठ आना, सोह्र आना र बत्तीस आनाका माछा पनि ढोक्सामा पर्ने व्यवस्था सरकारले गरोस् ।’ उनले भने, ‘सरकारले भुरालाई जालमा हाल्ने र ठूलालाई छोड्ने काम नगरोस् ।’

बैठकमा उनले पशुपतिनाथको जलहरी प्रकरणमा दुई थरीको मुचुल्का तयार भएको पाइएको भन्दै उनले यसबारे पनि सत्यतथ्य छानबिन गर्न माग गरे । पहिले तयार पारिएको मुचुल्कामा एकथरी तौल र अहिले तयार पारिएको मुचुल्कामा अर्को तौल रहेको उनको आरोप छ ।

पशुपततिको जलहरीमा १३ जनाको नाम कुँदिएको भन्दै उनले अझै केही ड्राइभर, कार्यालय सहयोगरी, पिएसओ र पीएको नाम छुटेको र उनीहरु सबैको नाम लेख्नुपर्ने कटाक्ष गरे ।