काठमाडौँ– सरकारले प्रस्तुत गरेको आर्थिक वर्ष २०८०–८१ बजेट प्रति असन्तुष्ट सत्तारुढ दलहरूको संसदीय दलको बैठक बस्दैछ । 

प्रतिनिधिसभा बैठक सुरु हुनु अघि सत्तारुढ दलहरू नेकपा एकीकृत समाजवादी, जसपा नेपाल, नागरिक उन्मुक्ति पार्टी र जनमत पार्टीले बैठक राखेर बजेटका बारेमा धारणा बनाउन लागेका हुन् । 

यी दलहरूले यथास्थितिमा बजेट पारित गर्न नसकिने सार्वजनिक रुपमा धारणा राख्दै आएका थिए । 

एकीकृत समाजवादीका उपाध्यक्ष राजेन्द्र पाण्डेले आजको बैठक पछि मात्रै आधिकारिक धारणा आउने बताए ।

प्रमुख प्रतिपक्षी दल नेकपा एमालेसहित विपक्षमा रहेका अन्य दलहरू रास्वपा, राप्रपा, नेमकिपालगायतले संशोधन बिना कुनै हालतमा बजेट पारित हुन नदिने बताउँदै आएका छन् ।

नेपाली कांग्रेस र नेकपा माओवादी केन्द्रले भने बजेट पारित गराउन हिजो नै आफ्ना सांसदहरूलाई बजेटको पक्षमा उभिन ह्विप जारी गरिसकेका छन् ।

सरकारले आजको बैठकमा बजेट पारित गर्नका लागि प्रस्ताव प्रस्तुत गर्दैछ ।