सिन्धुली– पारिवारिक मेलमिलाप र घरेलु हिंसा अन्त्य गर्ने उद्देश्यले सिन्धुलीको फिक्कल गाउँपालिकाले सासूबुहारीलाई सम्मान गरेको छ ।

गाउँपालिकाको आर्थिक वर्ष २०७९–८० को वार्षिक कार्यक्रमअन्तर्गत छवटा वडाका छ जोडी सासूबुहारीलाई सम्मान गरिएको हो ।

गाउँपालिकाका उपाध्यक्ष राजु बरालले गाउँघरमा सासूबुहारी सम्बन्धलाई नकारात्मक दृष्टिले हेर्ने परिपाटीलाई न्यूनीकरण गर्ने उद्देश्यले समाजमा रहेका अनुकरणीय सासूबुहारीलाई गाउँपालिकाले हरेक वर्ष सम्मान गर्दै आएको बताए ।

प्रत्येक वडाका उत्कृष्ट सासूबुहारीलाई खोजी हरेक वर्ष गाउँपालिकाले सम्मान गर्ने कार्यलाई निरन्तरता दिने उनको भनाइ छ । 

उनले ज्येष्ठ नागरिकलाई गरिने व्यवहार सकारात्मक र बुहारीलाई पनि छोरीसरह व्यवहार होस् भनेर गाउँपालिकाले सम्मान गर्दै आएको र सबै वाडामा यसै प्रकारले सम्मान गरिने बताए ।

गाउँपालिकाले मेलमिलापका साथ छोराबुहारीसँगै बसेका छ वडाका १२ सासूबुहारीलाई प्रमाणपत्रसहित दोसल्ला ओढाएर सम्मान गरेको छ । 

सम्मानित हुनेमा वडा नम्बर १ का मुसीमाया कामी, अन्जना बिक, वडा नम्बर २ का बालकुमारी मगर, गङ्गाकुमारी मगर, वडा नम्बर ३ का कल्पना कुमारी श्रेष्ठ, मुना श्रेष्ठ, वडा नम्बर ४ का मैया आले र लीलाकुमारी मगर, वडा नम्बर ५ शिवकुमारी घिमिरे, पार्वती घिमिरे र वडा नम्बर ६ का बुद्धमाया मगर र जमुना मगर रहेका छन् ।

उनीहरूलाई सासूले बुहारीलाई छोरी समान र बुहारीले सासुलाई आमाको भूमिकामा राखेको जनाउँदै सम्मान गरिएको हो । 

गाउँपालिका अध्यक्ष पार्वती सुनुवारले समाजमा छोराबुहारीबीचको सम्बन्धलाई हेर्ने दृष्टिकोणमा फरक ल्याउनु पर्नेमा जोड दिइन् । अब सासु होइन आमा र बुहारी नभई छोरीको सम्बन्ध कायम गर्नुपर्नेमा उनले जोड दिइन् ।