काठमाडौँ– टाइटानिक जहाजको भग्नावशेष देखाउन पर्यटक बोकेको पनडुब्बी एट्लान्टिक महासागरमा बेपत्ता भएको छ। पनडुब्बीमा पाइलटसहित पाँच जना रहेका थिए । आइतबारदेखि पनडुब्बी बेपत्ता भएपछि उद्धार टोलीले एट्लान्टिक महासागरमा खोजी कार्य जारी राखेको छ ।

पर्यटकलाई टाइटानिकको भग्नावशेष देखाउन लैजान प्रयोग गरिँदै आएको पनडुब्बी बेपत्ता भएपछि खोजी र उद्धार अभियान सुरु गरेको बोस्टन कोस्टगार्डले बीबीसीलाई बताए

पनडुब्बीमा सीमित अक्सिजन रहेको हुनाले हरेक मिनेटको गणना हुने अधिकारीहरू बताउँछन्। सोमबार साँझ अधिकारीहरूले भनेका छन्, ‘हाम्रो अनुमान छ कि उहाँहरूसँग यस समयमा ७० देखि ९६ घण्टा अक्सिजन उपलब्ध छ।’

टाइटानिकको भग्नावशेष क्यानडाको तटबाट ४०० नटिकल माइल टाढा एट्लान्टिक महासागरको मुनि ३ हजार ८०० मिटर तल छ। सो पानी जहाज अप्रिल १९१२ मा आफ्नो पहिलो यात्रामा आइसबर्गमा ठोक्किए पछि डुबेको थियो ।

सो जहाजमा रहेका २२ सय जना मध्ये ६०७ जना मात्र बाँचेका थिए । जुन जहाज १९८५ मा पत्ता लागेको थियो ।