काठमाडौँ- नेकपा एमालेका अध्यक्ष केपी शर्मा ओलीले एमालेमा ७० वर्षको उमेरहद उपयुक्त नभएको र यसका कारण प्रगति गर्न पनि अफ्ठ्यारो भएको बताएका छन् ।

शनिबार ललितपुरमा अखिल नेपाल महिला संघ बागमती प्रदेश सम्मेलनको उद्घाटन गर्दै अध्यक्ष ओलीले संसारमा कहिँ नभएको ७० वर्षे प्रावधानले पार्टीलाई नै अघि बढाउन समस्या भएको र उपयुक्त नभएकाले हटाउने निर्णय गर्नुपरेको बताएका हुन् ।

उनले ७० वर्षको उमेरहदका विषयमा असन्तुष्टि जनाउनु राजनीतिक विषय नभएको भन्दै पार्टी नेतृत्वमा आउन मन लागे आगामी महाधिवशेनमा अध्यक्ष, उपाध्यक्ष, महासचिव लगाएतका पदमा चुनाव लड्न पार्टी नेताहरुलाइ सुझाव दिए ।

ओलीले ७० वर्षको उमेरहदका कारण धेरै नेताहरु हच्किएको र राजनीति नै छोडनुपर्ने स्थिति देखा परेको जिकिर गरे । एमालेलाई एकताबद्ध गर्न र एमालेमा प्रवेश गर्न चाहनेहरुलाई बाटो खुल्ला गर्न पनि उमेरहदलाई हटाउनै पर्ने देखिएको उनको भनाइ छ ।

ओलीले अनावश्यक विषयमा नअल्झन पार्टीका नेताहरुलाई आग्रह गर्दै देश बनाउने काममा एमालेलाई बलियो बनाउनका लागि एकजुट हुन सुझाव दिए ।