काठमाडौँ– राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले आगामी आर्थिक वर्षको बजेटमा सत्तापक्षकै सांसदहरूको रुवाबासी देखिएको बताएका छन् । 

आज प्रतिनिधिसभा बैठकमा बिभिन्न मन्त्रालयसम्बन्धी विनियोजन शीर्षकमाथिको छलफलका क्रममा उनले बजेटका विषयमा प्रतिपक्षीको भन्दा पनि सत्ता पक्षका केही सांसदको बढी रुवाबासी देखिएको बताए ।
उनले बजेट सच्याएर ल्याउन सरकारसँग माग गरे । बजेट सच्याएर ल्याउने काम सत्तापक्षले गरे राम्रो परम्पराको सुरुवात हुने र संसदको पनि गरिमा बढ्ने उनको भनाइ थियो ।

उनले बजेट बनाउँदा देखिएको प्रवृत्तिले अहिलेको व्यवस्थालाई नै कमजोर बनाउने धारणा राखे । 

अध्यक्ष लिङ्देनले केन्द्रबाट बाटोका लागि छुट्याइएको रकम एक–दुईलाख भएपनि हुने प्रवृत्ति देखिएको भन्दै कनिका छर्ने बुद्धि र ज्ञान मन्त्रीहरूलाई कसले दियो भन्दै प्रश्न गरे ।