काठमाडौँ – प्रकृतिको पूजा गरेर मनाइने मगर समुदायको भुमे/भूम्या पर्व असार १ गते देखि ३ गते सम्म खुल्ला मञ्च काठमाडौँमा मनाइने भएको छ ।

नेपाल मगर संघले बिहीबार काठमाडौँमा पत्रकार सम्मेलन गर्दै संघको आयोजना र भुमे पर्व प्रतिष्ठानको ब्यावस्थापनमा भुमे/भूम्या पर्व खुल्ला मञ्चमा मनाउन लागिएको जानकारी दिएको हो ।

प्राकृतिक विपत्ति नआओस् भूतप्रेत, ग्रहदशा जाउन् बालीनालीमा किरा नलागोस् भनेर मगर समुदायमा हरेक असार १ गतेदेखि भुमे/भूम्या पर्व मनाउने प्रचलन छ ।

भुमे/भूम्या पर्वको खुल्लामञ्चमा असार १ गते प्रधानमन्त्री पुष्पकमल दाहाल प्रचण्डले उद्घाटन गर्ने र असार ३ गते पर्यटनमन्त्रीले समापन गर्ने कार्यक्रम रहेको मगर संघले जनाएको छ ।

विशेष गरी अथार मगरात क्षेत्रमा मनाइने भुमे/भूम्या पर्व पछिल्लो समय काठमाडौँ उपत्यका लगायत विदेशमा पनि मगर समुदायले धूमधामका साथ मनाउने गरेका छन् ।

भुमे/भूम्या पर्वको अघिल्लो दिन युवा युवतीहरूले बुकी (लेक) तथा अग्ला पहाडबाट ल्याएको फूल असार १ गते बिहान बस्तीका हरेक घरमा भित्र्याएपछि भुमे/भूम्या भित्रिएको मानिन्छ ।

असार १ गते बिहान बलि दिएर पूजा गरेपछि भुमे/भूम्या/नोकोबाङ्गे नाच सुरु हुने प्रचलन छ ।