लखनउ– भारत उत्तर प्रदशेको सोनभद्र जिल्लामा जमिनका विषयमा विवाद हुँदा ९ जनाको हत्या भएको छ ।

सोनभद्र जिल्लाको उभवन गाउँमा जमिनको विषयमा गाउँका प्रधान र स्थानीय गाउँलेको पक्षबीच भएको विवादका क्रममा गाउँका प्रधान पक्षले ९ जनाको हत्या गरेको जनाइएको छ ।

मृत्यु हुनेमा ६ पुरुष र तीन महिला रहेको भारतीय सञ्चामाध्यमले जनाएका छन् । दुई पक्षबीच भएको भिडन्तका क्रममा गाउँका प्रधान पक्षले स्थानीयविरुद्ध जथाभावी गोली वर्षाएको जनाइएको छ ।

जवाफमा गाउँलेले लाठी र ढुङ्गामुढा प्रहार गरेका थिए । घटनामा २५ जना घाइते भएका छन् । दुई वर्षअघि गाउँका प्रधानले ९० बिघा जग्गा किनेको र प्रधानले दलबलसहित उक्त जग्गा कब्जा गर्न जाँदा गाउँलेहरुले विरोध जनाएपछि दुई पक्षबीच भिडन्त भएको जनाइएको छ ।

हाल सो क्षेत्रमा ठूलो सङ्ख्यामा प्रहरी तैनाथ गरिएको अधिकारीले जनाएका छन् ।