काठमाडौं– विप्लव नेतृत्वको नेपाल कम्युनिस्ट पार्टीसँग वार्ताको जिम्मेवारी पाएका सांसद सामप्रसाद पाण्डेले विप्लव समूहसँग अनौपचारिक रुपमा मात्र वार्ता भएको बताएका छन् ।

प्रधानमन्त्री केपी शर्मा ओलीलाई विप्लव समूहसँग भएको पछिल्लो छलफल बारे ‘ब्रिफिङ’ गर्न बालुवाटार पुगेका पाण्डेले बाहिर सञ्चारमाध्यममा आएजसरी वार्ता नभएको बताए ।

‘बाहिर सञ्चारमाध्यममा आएजस्तो केही भएको छैन’ सांसद पाण्डेले भने,‘तर हामी निरन्तर लागिरहेका छौं ।

पाण्डले मंगलबार राजधानी बाहिर विप्लव समूहको वार्ता टोलीका एक सदस्यसँग वार्ता गरेको समाचारहरु सार्वजनिक भएका थिए ।

‘मलाई नेकपाले वार्ताको जिम्मेवारी दिएको हो’ सांसद पाण्डेले भने,‘म पार्टी र सरकारसँग कुराकानी नगरी र अनुमति नलिइ उहाँहरु(विप्लव)सँग औपचारिक कुराकानी हुँदैन ।’

विप्लव समूहसँग भएका अनौपचारिक कुराकानीबारे प्रधानमन्त्री केपी ओलीलाई ‘ब्रिफिङ’ गर्न बालुवाटार पुगेका सांसद पाण्डेले प्रधानमन्त्री ओलीसँग भेटवार्ता गर्न भने पाएनन् ।

‘प्रधानमन्त्री ज्यूलाई सञ्चो रहेनछ त्यसैले आज कुराकानी हुन सकेन’ पाण्डेले खबरहबसँग भने ।