नयाँदिल्ली – प्रधानमन्त्री पुष्पकमल दाहाल ‘प्रचण्ड’ले आफ्नो भारत भ्रमणपछि दुई देशबीचको मैत्री सम्बन्ध थप नयाँ उचाइमा पुग्ने विश्वास व्यक्त गरेका छन्।

नयाँदिल्लीस्थित नेपाली दूतावासले आफ्नो सम्मानमा आयोजना गरेको रात्रिभोजसहितको कार्यक्रममा प्रचण्डले आफ्नो भ्रमण आपसी विश्वासका लागि सद्भावना अभिवृद्धि गर्न र दुई देशको हितमा केन्द्रित रहने बताएका हुन्।

नेपाल र भारतबीच सदिऔँ पुरानो र जनस्तरको सम्बन्ध रहेको दोहोर्‍याउँदै उनले यो अवसरमा भारतीय समकक्षी नरेन्द्र मोदीसँग द्विपक्षीय हित र चासोका विविध विषयमा छलफल हुने पनि जानकारी दिए।

प्रधानमन्त्री प्रचण्डले भारतमा अध्ययन, रोजगारीलगायत अन्य काममा रहेका नेपालीहरुलाई भारतमा सिकेको सीप तथा ज्ञानलाई स्वदेश फर्केर समृद्धिका लागि जुट्न आह्वानसमेत गरेका छन्।

सरकारले हालै मात्र वैदेशिक रोजगारीमा रहेका नेपालीलाई समेत सामाजिक सुरक्षाको अभियानमा संलग्न गराएकाले त्यसबाट लाभ लिन पनि उनले आग्रह गरे।