अमृतसर- भारतीय सीमा सुरक्षा बलले पञ्जाब राज्यको अमृतसरनजिकै सीमा क्षेत्रमा लागूऔषध बोकेको चालकरहीत पकिस्तानी ड्रोन खसालेका छन् । सीमा सुरक्षा बलका जवानहरूले शनिबार राति अमृतसरनजिकैको धनोए खुर्द क्षेत्रमा लागूऔषध हेरोइन बोकेको पाकिस्तानी ड्रोन खसालेका हुन् ।

ड्रोनमा ३.४ किलो अवैध लागूऔषध हेरोइन रहेको भारतीय सञ्चारमाध्यमले जनाएका छन् । यससँगै ड्रोनबाट खसेको हेरोइन लिन आएका एक जना तस्करलाई नियन्त्रणमा लिइएको छ ।

स्थानीय समयअनुसार शनिबार अबेर साढे ९ बजेतिर पाकिस्तानबाट उडेको ड्रोनको आवाज सुनेपछि सो क्षेत्रमा गस्ती गरिरहेका सुरक्षा बलका सुरक्षाकर्मीले हवाई फायर गरेका थिए ।

सुरक्षाकर्मीको हवाई फायरबाट उक्त ड्रोन नजिकैको खेतमा खसेको बताइएको छ । सोही खेतमा खोजतलास गर्ने क्रममा डीजेआई मेट्रिस आरटीके ३०० ड्रोन बरामद गरेका हुन् ।

बरामद गरिएको ड्रोनमा तीन वटा पोका पारिएका ३ किलो ४ सय ग्राम लागूऔषध हेरोइन रहेको सुरक्षा अधिकारीलाई उद्धृत गर्दै भारतीय अखबार अमर उजालाको अनलाइन संस्करणले जनाएको छ।

पछिल्लो समय पाकिस्तानबाट ड्रोनमार्फत् भारततर्फ लागूऔषध तस्करी हुँदै आएको बताइन्छ ।