विराटनगर – कोशी प्रदेश सभाको बजेट अधिवेशन आज सुरु हुँदैछ । यो अधिवेशनको पहिलो बैठक दिउँसो २ बजेका लागि बोलाइएको छ ।

प्रदेशको नामाङ्कनपछि आज पहिलो पटक बस्न लागेको बैठकमा प्रदेश प्रमुखले पठाएको पत्र सभामुखले सुनाएपछि केही प्रदेश ऐन संशोधन गर्न बनेको विधेयक पेस गर्ने कार्यसूची रहेको छ । यसैगरी प्रदेश सरकारले जारी गरेका २ वटा अध्यादेश टेवल गर्ने कार्यसूची पनि छ ।

प्रदेशको बजेट अधिवेशनलाई लक्षित गर्दै पहिचानवादीहरुले भने आज बिहानैदेखि प्रदेश सभा भवन अगाडि प्रदर्शनको तयारी गरेका छन् ।

गत फगुन १७ गते प्रदेशको नाम कोशी राखेको विरोधमा पुन: नामाङ्कन गर्न माग गर्दै पहिचान पक्षधरहरु संघर्ष समिति गठन गरेर आन्दोलनमा उत्रिएका हुन्।

प्रदेशको नाम संशोधन गर्ने थलो प्रदेश सभा नै रहेकाले आजदेखि प्रदेश सभा केन्द्रित आन्दोलन सुरु गरेको आन्दोलनकारीको चेतावनी छ।

जिल्ला प्रशासन कार्यालयले भने पहिचानवादीको आन्दोलनलाई मत्थर बनाउन शनिबारदेखि नै विराटनगर क्षेत्रमा अनिश्चितकालीन निषेधाज्ञा जारी गरेको छ ।