धनगढी– सुदूरपश्चिमका युवायुवतीलाई संसदीय प्रणालीसम्बन्धी अभ्यास गराइएको छ ।

सुदूरपश्चिम प्रदेश युवा परिषदले उक्त अभ्यास गराएको हो । प्रदेशका युवाहरूको नेतृत्वदायी क्षमता अभिवृद्धि गर्ने हेतुले धनगढीमा ४ दिने संसदीय अभ्यास गराइएको बताइएको छ । नमूना युवा संसद् अभ्यासमा सामेल युवाले संसद्का काम कारबाही, सरकारका काम र छनौट हुने योजना लगायतका बारेमा जानकारी गराइएको हो ।

यस्तै उनीहरूले नमूना युवा संसद् अभ्यासबाट नेतृत्वदायी क्षमताको विकाससँगै सही नेतृत्व छनौट र आफ्ना अधिकारका विषयमासमेत जानकारी लिएको बताएका छन् । सुदूरपश्चिम प्रदेशका प्रत्येक जिल्लाबाट प्रतिनिधिमूलक रुपमा युवायुवतीलाई उक्त कार्यक्रममा सहभागी गराइएको थियो ।

उक्त कार्यक्रममा प्रतिनिधि सभा, प्रदेशसभाले बनाउने ऐन, कानुन र कार्यान्वयनका चरणहरू बारे छलफल गरिएको थियो । जेठ ९ गतेदेखि सुरु भएको नमूना युवा संसद् अभ्यास आज १२ गतेसम्म चलेको थियो ।

 प्रदेश युवा परिषद सुदूरपश्चिमले हरेक वर्ष कार्यक्रम नै राखेर नमूना युवा संसद् अभ्यास आयोजना गर्दै आइरहेको छ ।