काठमाडौँ– राजधानीमा जारी सहिद स्मारक ए डिभिजन लिग फुटबलमा एपीएफ क्लबसँग मनाङ मर्स्याङ्दी क्लब बराबरीमा रोकिएको छ ।

आइतबार त्रिपुरेश्वरस्थित दशरथ रंगशालामा भएको खेलमा मनाङले एपीएफ क्लबसँग २-२ गोलको बराबरी खेलेको हो । खेलको १३ औं मिनेटमा कोफी कुडोले गोल गर्दै मनाङलाई सुरुआती अग्रता दिलाएका थिए । तर खेलको २० औं मिनेटमा नवीन लामाले गोल गर्दै एपीएफलाई १-१ गोलको बराबरीमा ल्याए । खेलको २६ औं मिनेटमा सुमित श्रेष्ठले गोल गर्दै मनाङलाई २-१ को अग्रता दिलाए । त्यसपछि खेलको ६४ औं मिनेटमा अर्मान्ड बिडोमले गोल गर्दै एपीएफलाई २-२ गोलको बराबरीमा ल्याए ।

बराबरीसँगै मनाङले २० खेलमा २४ अंक जोडेको छ । एपीएफले २० खेलमा २३ अंक जोडेको छ । त्यस्तै आइतबार नै च्यासल मैदानमा भएको खेलमा मच्छिन्द्रले न्युरोड टिमलाई २-० गोल अन्तरले पराजित गर्यो । मच्छिन्द्रका लागि ओलावाले आफिजले खेलको १३ मिनेट र सौरभ लिम्बुले इन्जुरी समयमा गोल गरेका थिए ।

 जितसंगै २० खेलमा मच्छिन्द्रले ३४ अंक जोडेको छ भने समान खेल खेलेको न्युरोड टिमको २३ अंक रहेको छ ।