अष्ट्रेलियाली सहायक परराष्ट्र मन्त्री टिम वाट्स, एमपि, दुई दिने भ्रमणका क्रममा आज काठमाडाैँ आइपुगेका हुन् । भ्रमणमा अष्ट्रेलिया र नेपालसँगको सम्बन्ध र भविष्यमा हुनसक्ने सहकार्यका अवसरहरूको बारेमा छलफल हुनेछ ।

सहायक मन्त्री वाट्सले प्रधानमन्त्री पुष्प कमल दाहालसँग र परराष्ट्रमन्त्री नारायण प्रकाश साउदसँग शिष्टाचार भेट गर्नेछन् । उनले भेटमा अष्ट्रेलियासंगको सहकार्य, ६३ बर्ष भन्दा पुरानो दौत्य सम्बन्ध र झाँगिदो जनस्तरको सम्बन्धको बारेमा  छलफल गर्नेछन् । अष्ट्रेलियामा नेपाली समुदाय सबै भन्दा चाँडो बढिरहेको आप्रवासी जनसंख्या भएको छ र हाल करिब १३०,००० जना नेपालीहरू अष्ट्रेलियामा बसोबास गर्दछन् ।  

भ्रमण कार्यक्रमको मुख्य आकर्षणका रुपमा ई.सं १३औं शताव्दीको पाटनको सुलीम टोल स्थित रत्नेश्वर मन्दिरको टुँडाल समुदायलाई फिर्ता गर्न पाटन संग्राहालयमा आयोजना हुने कार्यक्रममा सहायक मन्त्री वाट्स सहभागी हुनेछन् । आर्ट ग्यालरी न्यु साउथ वेल्सले यो महत्वपूर्ण कलाकृति नेपाललाई फिर्ता गरेको हो र उक्त संग्राहालयका निर्देशक डा. माईकल ब्रान्डले उक्त टुँडाल हस्तान्तरण गर्ने कार्यक्रम रहेको छ । 

काठमाडाैँ विश्वविद्यालयमा सहायक मन्त्री वाट्सले उक्त विश्वविद्यालयको हाल अष्ट्रेलियाली संस्थाहरूसंग भइरहेको सहकार्य र खानी उत्खनन, हरित हाइड्रोजन इन्धन सम्बन्धी अनुसन्धान र हाल भईरहेका विद्यार्थी आदानप्रदान कार्यक्रम लगायतका विषयहरूमा भविष्यमा हुनसक्ने सहकार्यका बारेमा जानकारी लिनेछन् ।  

सहायक मन्त्री वाट्सले बनेपा स्थित बायोभ्याक कम्पनीमा अत्याधुनिक निदानात्मक परिक्षण प्रयोगशाला र पशु खोप विकास तथा उत्पादन कार्यमा अष्ट्रेलियाबाट भएको प्रविधि हस्तान्तरण र शैक्षिक र अनुसन्धान सहकार्यका बारेमा जानकारी लिने छन् ।  

सहायक मन्त्री वाट्सले डा सन्दुक रुइत र अष्ट्रेलियाली डा फ्रेड हलोजको सहकार्यमा स्थापित आँखा स्वास्थ्यको उत्कृष्ट केन्द्रका रुपमा परिचित तिलगंगा आँखा प्रतिष्ठानको भ्रमण गर्ने कार्यक्रम छ । गएका तीस वर्षहरूमा अष्ट्रेलियाली सरकार र फ्रेड हलोज फाउण्डेशनले तिलगंगा आँखा प्रतिष्ठानलाई आँखा स्वास्थ्य सेवा प्रदान गर्न सहयोग गरिरहेको छ । साथै उक्त सहयताबाट नेपालमा र अन्तराष्ट्रिय स्तरमा बितरण हुने ईन्ट्रा अकुलर लेन्स उत्पादन गर्ने कारखाना स्थापना भएको छ । 

सहायक मन्त्री वाट्सले अष्ट्रेलियाका हिन्दु र बौद्धमार्गीहरूको आस्थाको केन्द्र रहेका र उनीहरूको सांस्कृतिक सम्बन्ध रहेको पशुपतिनाथ मन्दिर र बौद्धनाथ पेरिसको पनि भ्रमण गर्नेछन् । उनले अष्ट्रेलियाबाट शिक्षा प्राप्त गरेर नेपालका बिभिन्न क्षेत्रमा कार्य गर्दै सफलता हासिल गरेका नेपाली विद्यार्थीहरूलाई पनि भेट्ने कार्यक्रम रहेको छ । 

यसै गरि सहायक मन्त्री वाट्सले अष्ट्रेलियामा निर्मित पोर्टेवल अल्टिटुड च्यामबर हिमालयन उद्धार संघलाई हस्तान्तरण गर्ने कार्यक्रम रहेको छ । उक्त उपकरण संघले फेरीचे र सगरमाथा आधार शिविरमा रहने आकस्मिक क्लिनिकमा प्रयोग गर्नेछ । 

सहायक मन्त्री वाट्सको यो भ्रमण कार्यक्रममा बंगलादेशमा छैटौं हिन्द महासागर सम्मेलनमा सहभागी हुने र भुटान र भारतको भ्रमण गर्ने कार्यक्रम पनि समावेश छ ।