काठमाडौँ- नेपाली कांग्रेसका महामन्त्री गगनकुमार थापाले पार्टीको गतिविधिप्रति असन्तुष्टि जनाएका छन् ।

सामाजिक सञ्जाल फेसबुकमार्फत् महामन्त्री थापाले पार्टीमा कतिपय कुराहरु चित्त नबुझेको भन्दै असन्तुष्टि जनाएका हुन् । यद्यपि उनको असन्तुष्टि के विषयमा हो भन्ने खुलेको छैन ।

उनले आफूलाई पार्टीमा कहिले प्रक्रिया चित्त नबुझेको, कहिले पद्धति र कति निर्णयहरू मन नपरेको उल्लेख गर्दै आफूले राखेका कतिपय विषयले पार्टीमा प्रवेश नपाएको बताएका छन् । धेरै पटक आफूलाई यसबारे प्रतिरोध गरूँ भन्ने लागेको भएपनि पार्टीको जिम्मेवारी लिएर बसेकाले सीमा बुझेर आफू मौन रहेको उनको भनाइ छ ।

‘कहिले प्रक्रिया चित्त बुझेन, कहिले पद्धति, कति निर्णयहरू मन परेनन्, कति आफूले राखेका विषयले प्रवेश नै पाएनन्, धेरै पटक लाग्यो प्रतिरोध गरूँ, तर हरेक पटक सोचेँ, म जिम्मेवारी लिएर बसेको छु, एउटा सीमा छ।’ उनले फेसबुकमा लेखेका छन् ।

उनले यस्तो अवस्था रहेपनि पार्टीभित्र आफ्ना मत र अडान राखेको उल्लेख गर्दै कतिपय साथीहरूलाई सम्झाएको पनि बताए । तर अब अति भएको उनको भनाइ छ । ‘ त्यसैले कहिले मौन रहेँ त कहिले भित्रै आफ्ना मत र अडान राखेँ, लडे, साथीहरूलाई सम्झाएँ तर अब त अति भयो !’ उनले लेखेका छन् ।