काठमाडौँ – पेरिस सेन्ट जर्मेन (पीएसजी) घरेलु मैदानमा लोरिएन्टसँग पराजित भएको छ।

फ्रेन्च लिग वानको शीर्षस्थानमा रहेको पीएसजी घरेलु मैदानमा आइतबार राति भएको खेलमा लोरिएन्टसँग ३–१ ले पराजित भएको हो।

पार्क डेस प्रिन्सेस पेरिसमा खेलको १५औं मिनेटमा एन्जो लि फिको गोलबाट लोरिएन्टले सुरुवाती अग्रता लियो तर, २९औं मिनेटमा एमबाप्पेले गोल गर्दै खेललाई १–१ गोलको बराबरीमा ल्याई दिए।

डारलाइन योङ्वाले ३९औं मिनेटमा थप गोल गरे पछि लोरिएन्ट पहिला हाफमा २–१ को अग्रता लिन सफल भयो।

डिफेन्डर अचरफ हाकिमी १५ मिनेटको अन्तरमा दोहोरो पहेलो कार्ड खाँदै मैदानबाट बाहिरिनु पर्‍यो। जसकाकारण पनि लोरियन्टसँग पीएसजीले १० खेलाडीमा सिमित भएर खेल्नु परेको थियो।

खेल सकिन केही समय बाँकी रहँदा ८८औं मिनेटमा एहमाडोउ बम्वा डिइङले गोल गर्दा लोरिएन्टले ३–१ को अन्तर कायम गर्न सफल भयो। त्यसपछि कतैवाट पनि गोल हुन सकेन र, घरेलु मैदानमा पीएसजी ३–१ ले पराजित हुन पुग्यो।

यस खेलमा पराजय भए पनि पीएसजी ३३ खेलबाट ७५ अंकसहित शीर्षस्थानमा छ भने लोरिएन्ट ३३ खेलबाट ४८ अंकसहित १०औं स्थानमा छ।