काठमाडौं–अविरल वर्षाका कारण बाढीपहिरो तथा डुबानबाट प्रभावित मुलुकका करिब ३१ जिल्लाको जनजीवन सामान्य बन्दै गएको छ ।

मनसुन सक्रिय भएसँगै बिहीबारबाट शुरु भएको बर्षाका कारण ६९ जनाले ज्यान गुमाएका छन् भने ३१ जना अझै बेपत्ता छन् ।

नेपाल प्रहरीका अनुसार ३८ जना घाइतेको विभिन्न अस्पतालमा उपचार भइरहेको छ ।

१६ हजार ५ सय २० घर परिवार अस्थायी रुपमा विस्थापित भएका छन् । विपद प्रभावितहरुको पुनःस्थापना तथा राहत वितरणका लागि करिब ३० हजार सुरक्षाकर्मीसहित नेपाली सेनाको चारवटा हेलिकोप्टर प्रयोग गरिएको छ ।

गृहमन्त्रालयका अनुसार बाढीपहिरो प्रभावित पहाडी जिल्लामा सोमबार दिउँसो देखि मौसम सफा हुनुका साथै तराई मधेसका जिल्लामा पनि पानीको सतह विस्तारै घट्दै गएको छ ।