काठमाडौँ- भारी वर्षापछि आएको बाढी र पहिरोको कारण प्रदेश नम्बर १ का विभिन्न जिल्लामा झण्डै ८२ करोड रुपैयाँ बराबरको खाद्यान्न तथा पशुजन्य वस्तुको क्षति भएको कृषि तथा पशुपंक्षी विकास मन्त्रालयले जनाएको छ ।

प्रदेश नम्बर १ का सोलुखुम्बु र इलामबाहेक अन्य १२ वटा जिल्लामा पशुपंक्षी तथा कृषिजन्य बस्तुमा ८२ करोड रुपैयाँ बराबरको क्षति पुगेको मन्त्रालयले जनाएको हो । कुखुरा, बंगुर, गाई लगायतका पशुपंक्षी क्षति हुँदा २४ लाख ८० हजार रुपैयाँ बराबरको नोक्सानी भएको छ । मन्त्रालयका अनुसार बाढी पहिरोका कारण धान, मकै, अलैंचीलगायतका खाद्यान्नमा ८१ करोड ५४ लाख ७२ हजार रुपैयाँ बराबरको क्षति भएको छ ।

मन्त्रालयका अनुसार अन्य प्रदेशहरुमा भएको क्षतिको विवरण संकलन भइरहेको छ । मन्त्रालयले दिएको जानकारीअनुसार कर्णाली र सुदुरपश्चिम प्रदेशमा बाढी पहिरोका कारण कृषिजन्य बस्तुमा कुनै पनि क्षति भएको छैन ।

सबै प्रदेशमा भएको क्षतिको विवरण आएपछि राहतको काम शुरु गर्ने तयारी मन्त्रालयले गरेको छ ।