काठमाडौँ- भारत र भुटान जोड्ने रेलमार्ग निर्माण हुने भएको छ । भुटानको गेलेफु र भारतको आसाम राज्यको कोक्राझारलाई जोड्ने रेलमार्ग निर्माण हुन लागेको हो ।

यस परियोजनाको सर्वेक्षण पूरा भएको भुटान लाइभले उल्लेख गरेको छ । यो भारत र भुटानबीचको पहिलो रेलमार्ग हुनेछ ।

यस रेलमार्ग सन् २०२६ सम्ममा सम्पन्न हुने अपेक्षा गरिएको छ । ५७ किलोमिटर रेलमार्ग निर्माणका लागि भारत सरकारले अनुदान दिने भारतीय सञ्चारमाध्यमले जनाएका छन् ।

केही समयअघि भुटानी राजा जिग्मे खेसर नामग्याल वाङ्चुक भारत भ्रमणमा आएका थिए । भारत भ्रमणका क्रममा  उनले भारतीय प्रधानमन्त्री नरेन्द्र मोदीसँग पनि भेटवार्ता गरेका थिए । उक्त भेटवार्तामा द्विपक्षीय सहयोग र राष्ट्रिय हितका विषयमा छलफल भएको जनाइएको छ ।