काठमाडौं– काम गर्न असुरक्षित भएको भन्दै कार्यक्षेत्र छाडेर धनगढी पुगेका डडेल्धुरा अस्पतालका चिकित्सकहरु काममा फर्किएका छन् ।

जिल्ला प्रहरी कार्यलयले चिकित्सकमाथी हातपात गर्ने व्यक्तिलाई पक्राउ गरी कानूनी कारबाही प्रक्रिया अघि बढाएसँगै चिकित्सकहरु जिल्ला फर्किएका हुन् ।

डडेल्धुरा अस्पतालमा पोष्टमार्टम गरीरहेका चिकित्सकमाथि हातपात गरिएको भन्दै जिल्ला अस्पतालमा कार्यरत ९ जना चिकित्सकले  शुक्रबादेखि जिल्ला छाडेका थिए । उनीहरु नेपाल चिकित्सक संघले व्यवस्थापन गरेको धनगढीस्थित एक होटलमा बसिरहेका थिए ।

जिल्ला प्रहरी कार्यलयले चिकित्सकमाथि हातपात गर्नेलाई पक्राउ गरी कारबाही अघि बढाएपछि आफूहरु जिल्ला फर्किएको एक चिकित्सकले बताए ।

‘हामीमाथि हातपात गर्ने व्यक्तिलाई प्रहरीले पक्राउ गरेर मुद्दा दर्ता गर्न लागेको छ । हाम्रो माग पनि हामीमाथि कार्यक्षेत्रमा हातपात गर्नेलाई कारबाही गर्नुपर्‍यो भन्ने नै हो,’ उनले भने, ‘उहाँहरुले दोषीलाई पक्राउ गरी हाम्रो सुरक्षाको जिम्मा लिने भएपछि हामी अस्पताल फर्कदै छौं । आज बेलुकासम्म अस्पताल पुग्छौं ।’

डडेल्धुरा अस्पतालमा गत असार २५ गते सवारी दुर्घटनामा परी मृत्यु एक व्यक्तिको पोष्टमार्टम गरिरहेका चिकित्सकमाथि मृतकका आफन्तले नै हातपात गरेका थिए ।

जिल्ला प्रहरी कार्यलय डडेल्धुराका अनुसार मदिरा सेवन गरी शव लिएर अस्पताल पुगेका मृतकका आफन्तले पोष्टमार्टमको काम ढिला गरेको भन्दै चिकित्सकलाई कार्यक्षेत्रमै अभ्रद व्यवहार गरेका थिए ।

प्रहरीले घटनामा संलग्न एक व्यक्तिलाई पक्राउ गरी सार्वजनिक स्थलमा चिकित्सकलाई अभ्रद व्यवहार गरेको भन्दै कारबाही प्रक्रिया अघि बढाएको छ ।