चितवन– सातौँ चितवन अन्तराष्ट्रिय औद्योगिक प्रदर्शनी बैशाख २२ गतेदेखि चितवनको भरतपुरमा आयोजना हुने भएको छ ।

चितवन उद्योग संघको आयोजना र नेपाल उद्योग परिसंघको प्रवर्द्धन सहयोगमा हुने प्रदर्शनी तीन दिनसम्म चितवन प्रदर्शनी केन्द्र भरतपुरमा आयोजना हुन लागेको हो । चितवन उद्योग संघ र नेपाल उद्योग परिसंघले सोमबार काठमाडौंमा पत्रकार सम्मेलन गर्दै उद्यमशीलता विकास र औद्योगिक उत्पादकत्व अभिवृद्धि गर्न औद्योगिक प्रदर्शनी आयोजना गर्न लागिएको जनाएको हो ।

प्रदर्शनीमा राष्ट्रिय र अन्तर्राष्ट्रिय गरी २०० बढी प्रविधिसहितको प्रदर्शनीका स्टल रहने चितवन उद्योग संघका अध्यक्ष त्रिलोचन कँडेलले जानकारी दिए । नेपाली उत्पादनको बजारीकरण र प्रविधि हस्तान्तरणका लागि प्रदर्शनी उपयुक्त हुने उनले बताए ।

त्यस्तै नेपाल उद्योग परिसंघका अध्यक्ष विष्णुकुमार अग्रवालले मुलुकमा देखिएको आर्थिक समस्याका कारण उद्योग क्षेत्रमा समेत समस्या परिरहेको अवस्थामा औद्योगिक प्रदर्शनी हुनु सकारात्मक भएको बताए । यसले सम्पूर्ण उद्योगीहरूको मनोमल बढाउन मद्दत पुग्ने उनको विश्वास छ । 

औद्योगिक, प्याकेजिङ, पूर्वाधार, अटोमोबाइल्स कृषि जस्ता क्षेत्रका प्रविधि प्रदर्शनीमा बढी प्राथमिकतामा रहेको आयोजकले बताएका छन् ।