ओटावा– चीन र क्यानाडाबीच कूटनीतिक तनाव बढ्दै जाँदा अर्का एक क्यानाडेली नागरिक चीनमा पक्राउ परेका छन् ।

क्यानाडा सरकारका प्रवक्ताले जनाएअनुसार ती क्यानाडेली नागरिक पूर्वी चीनको यानाताई शहरमा पक्राउ परेका हुन् । पक्राउ परेका क्यानाडेली नागरिकको पहिचान र पक्राउ पर्नुको कारणबारे केही खुलाइएको छैन ।

यसअघि गत मंगलबार चीनले पूर्वी शहर शुझोउमा अधिकांश विदेशी शिक्षक तथा विद्यार्थी सहित १९ जनालाई पक्राउ गरेको थियो । ती विदेशीलाई प्रतिबन्धित औषधि कारोबारको आरोपमा पक्राउ गरिएको चीनको दाबी थियो ।

गत डिसेम्बरमा क्यानाडाले चिनियाँ प्राविधिक उपकरण निर्माता कम्पनी हुवावेकी प्रमुख वित्तीय अधिकारी मेङ वान्झुलाई पक्राउ गरी अमेरिकातर्फ सुपुर्दगीको पक्रिया अघि बढाएपछि क्यानाडा र चीनबीचको कूटनीतिक सम्बन्ध चिसिएको छ ।

क्यानाडाले आफ्ना नागरिक पक्राउ परेको घटना राजनीतिक स्वार्थबाट प्ररित रहेको भन्दै विरोध गरेको छ ।