काठमाडौँ- पाकिस्तानी गुप्तचर निकायले बलुचिस्तान प्रान्तमा पृथकतावादी गतिविधि गर्दै आएको एक सङ्गठनका संस्थापक नेतालाई पक्राउ गरेको छ ।

पाकिस्तानी सेनाको गुप्तचर इकाइबाट खटिएको एक टोलीले बलुच नेशनलिस्ट आर्मी (बीएनए) का संस्थापक नेतालाई पक्राउ गरिएको हो ।

पाकिस्तानी सेनाको सञ्चार शाखा अन्तरसेवा सार्वजनिक सम्बन्ध आईएसपीआरका अनुसार सेनाको गुप्तचर निकायले देशको दक्षिणपश्चिम बलुचिस्तान प्रान्तमा आतङ्कवादी गतिविधिमा संलग्न गुलजार इमाम उर्फ शम्बेलाई पक्राउ गरिएको हो ।

बीएनएले सुरक्षा निकायलाई लक्षित गरी बारम्बार घातक आक्रमण गर्दै आएको छ । शम्बेको गिरफ्तारीबाट बलुचिस्तानमा पृथकतावादी गतिविधि नियन्त्रणमा सहयोग पुग्ने आईएसपीआरले उल्लेख गरेको छ ।

शम्बेको गिरफ्तारी पाकिस्तानी जनता र सेनाको आतङ्कवादलाई परास्त गर्ने प्रतिबद्धताको एक अभिन्न अङ्ग भएको उल्लेख गर्दै आईएसपीआरले जारी गरेको विज्ञप्तिमा देशमा शान्ति, सुव्यवस्था कायम गर्न पाकिस्तानको राष्ट्रिय सेना दृढ रहेको उल्लेख गरिएको छ ।-