काठमाडौँ- बाराको निजगढ नगरपालिका–९ की एक महिला लाखौँ रुपैयाँ ठगेर फरार भएकी छिन् । निजगढ नगरपालिका–८ मा निक इम्पोरियम फ्यान्सी पसल सञ्चालन गर्दै आइरहेकी निलु नामले परिचित मनिला गौतम फरार भएकी हुन् ।

३३ वर्षीया गौतमले दर्जनौँ महिलासँग थप ट्रिपर खरिद गरी व्यवसाय सञ्चालन गर्ने तथा श्रीमानलाई विदेश पठाउनका लागि भन्दै लाखौँ रुपैयाँ सापटी लिएर फरार भएकी हुन् ।

उनले व्यावसाय सञ्चालन गर्ने भन्दै विभिन्न समयमा आफूसँग लाखौँ रुपैयाँ मागेको निजगढ ९ बस्ने रंजिता कुमारी श्रेष्ठले गुनासो गरिन् । उनका अनुसार केही समय पहिले मात्र नयाँ ट्रिपर खरिद गर्ने रकम अपुग भएको भन्दै गौतमले श्रेष्ठसँग पैसा सापटी लिएकी थिइन् ।

यस्तै, गौतमले अन्य कयौं महिलाहरुलाई समेत आकर्षक ब्याज दिने प्रलोभन देखाएर लाखौँ रकम असुल गरी फरार भएको पिडितको भनाइ छ । गौतमले छिमेकी तथा आफन्तसँग विभिन्न बहाना बनाएर लाखौँ रुपैयाँ सापटी लिएको बताइएको छ । अधिकांशले कागज नगरी उनलाई रकम दिएका छन् ।

गौतमले छिमेकी र आफन्तबाट सहकारीको ऋण तिर्न, छोराछोरीको पढाइ खर्च तिर्न, उपचार गर्ने, थप टिफर खरिद गरि व्यवसाय सञ्चालन गर्ने बहानामा रकम सापट माग्ने गरेका थिए । “छरछिमेकमा सरसापटी चलाउनु पर्छ भन्ने सोचेर कागज नगरी पैसा दियौँ,” पीडित रंजिता कुमारी श्रेष्ठले भनिन् ।

जिल्ला प्रहरी कार्यालय बारामा गौतमविरुद्ध जाहेरीसमेत परेको छ भने फरार रहेकी गौतमको खोजी भइरहेको बारा प्रहरीले जनाएको छ ।